ஐ.பி.எல். கிரிக்கெட்: சொல்லி அடித்த சென்னை சூப்பர் கிங்ஸ் அணி !!!" த்ரில் " வெற்றி !!!!

அசத்தியசென்னை அணி  கதிகலங்கியமும்பை இந்தியன்ஸ்  

 2 ஆண்டு தடை காலத்திற்கு பிறகு ஐ.பி.எல். போட்டிக்கு திரும்பிய சென்னை அணி இந்த 2018 - 11 வது சீசனை வெற்றியுடன் தொடங்கி அசத்தி  இருக்கிறது.

ஐபில் 11வது சீசன் 2018 - முதல் போட்டி 

 ஏப்ரல் 7-ந்தேதி நேற்று வான்கடே மைதானத்தில் 11-வது ஐ.பி.எல். 20 ஓவர் கிரிக்கெட் போட்டி  தொடங்கியது. மே 27 வரை நடைபெறும் இந்த தொடரில் நடப்பு சாம்பியன் மும்பை இந்தியன்ஸ், பெங்களூரு ராயல் 

சேலஞ்சர்ஸ், சென்னை சூப்பர் கிங்ஸ், கிங்ஸ் லெவன் பஞ்சாப், ஐதராபாத் சன் ரைசர்ஸ், , கொல்கத்தா நைட் ரைடர்ஸ், ராஜஸ்தான் ராயல்ஸ், டெல்லி டேர்டெவில்ஸ் ஆகிய 8 அணிகள் பங்கேற்றுள்ளன. ஒவ்வொரு அணியும் மற்ற அணிகளுடன் தலா 2 முறை மோத வேண்டும். 

நேற்று நடந்த தொடக்க லீக் ஆட்டத்தில் மும்பை இந்தியன்ஸ்-சென்னை சூப்பர் கிங்ஸ் அணிகள் மோதின.

டாஸ் வென்ற  டோனி 

 டாஸ் ஜெயித்த சென்னைசூப்பர் கிங்ஸ் அணி முதலில் பந்து வீச்சை தேர்வுசெய்தது. சென்னை வேகப்பந்து வீச்சாளர்கள் தீபக் சாஹரும், ஷேன் வாட்சனும் முதலில் பேட் செய்த மும்பை அணிக்கு,  நன்கு நெருக்கடி கொடுத்தனர். தொடக்க ஆட்டக்காரரான இவின் லீவிஸ் (0) தீபக் சாஹரின் பந்து வீச்சில் எல்.பி.டபிள்யூ. ஆனார். டி.ஆர்.எஸ். முறைப்படி அப்பீல் செய்தும் பலன் இல்லை. ஐ.பி.எல். வரலாற்றில் டி.ஆர்.எஸ். தொழில்நுட்பத்தை முதல்முறையாக பயன்படுத்தியவர் இவின் லீவிஸ் தான். ஐ.பி.எல்.-ல் இது தான் அவருக்கு முதல் ஆட்டம் என்பது குறிப்பிடத்தக்கது.

தடுமாறிய  மும்பை  

முதல் 10 ஓவர்களில் மும்பை அணி 2 விக்கெட்டுக்கு 65 ரன்களே எடுத்திருந்தது. பிற்பாதியில் மும்பை வீரர்கள் அதிரடி காட்டினர். இஷான் கிஷன் 40 ரன்களும் (4 பவுண்டரி, ஒரு சிக்சர்) சூர்யகுமார் யாதவ் 43 ரன்களும் (6 பவுண்டரி, ஒரு சிக்சர்),  தங்களது பங்குக்கு எடுத்தனர்.

பாண்டியா சகோதரர்கள் அபாரம் 

இறுதிகட்டத்தில் சகோதரர்கள் ஹர்திக் பாண்ட்யாவும், குணால் பாண்டயாவும் ஸ்கோரை கணிசமாக உயர்த்தினர். குறிப்பாக குணால் பாண்ட்யா, வேகப்பந்து வீச்சாளர் மார்க்வுட்டின் பவுலிங்கில் 2 சிக்சரை பறக்க விட்டு உள்ளூர் ரசிகர்களை குஷிப்படுத்தினார். நிர்ணயிக்கப்பட்ட 20 ஓவர் முடிவில் மும்பை அணி 4 விக்கெட் இழப்புக்கு 165 ரன்கள் சேர்த்தது.

இலக்கு நிர்ணயம் - சென்னை தடுமாற்றம் 

பின்னர் 166 ரன்கள் என்ற இலக்கை நோக்கி ஆடிய சென்னை அணிக்கு, ஆரம்பம் முதலே மும்பை பவுலர்கள் அதிரடி காட்டினர் . ஷேன் வாட்சன் (16 ரன்), துணை கேப்டன் சுரேஷ் ரெய்னா (4 ரன்), அம்பத்தி ராயுடு (22 ரன்), கேப்டன் டோனி (5 ரன்), ஜடேஜா (12 ரன்) ஆகியோர் அதிக நேரம் தாக்குப்பிடிக்கவில்லை. சென்னை அணி 75 ரன்களுக்குள் 5 விக்கெட்டுகளை (12 ஓவர்) இழந்து தத்தளித்தது. 

ஜாதவ் காயம் 

மேலும் கேதார் ஜாதவ் காயம் காரணமாக மைதானத்தை விட்டு வெளியிறினார் இதனால் சென்னை சூப்பர் கிங்ஸ் அணியின் மேலும் வலுவிழந்து காணப்பட்டது.

ப்ராவோ அசத்தல் அதிரடி 

இந்த நிலையில் களம் இறங்கிய  ஆல்-ரவுண்டர் வெய்ன் பிராவோ தனிநபராக ஆட்டத்தின் போக்கை மாற்றி அனைவரையும் பிரமிக்க வைத்தார். மும்பை பந்து வீச்சை நான்கு திசைக்கும் பறக்கவிட்ட அவர், சென்னை அணிக்கு நம்பிக்கைவூட்டினார். 

 கடைசி 2 ஓவர்களில் வெற்றிக்கு 27 ரன்கள் தேவைப்பட்டது. 19-வது ஓவரை வீசிய பும்ராவின் பந்து வீச்சில் பிராவோ 3 சிக்சர் உள்பட 20 ரன்கள் சேகரித்ததுடன் கடைசி பந்தில் கேட்ச் கொடுத்து அவுட் ஆனார். பிராவோ 68 ரன்களில் (30 பந்து, 3 பவுண்டரி, 7 சிக்சர்) பெவிலியன் திரும்பினார்.

சென்னை அணி அதிரடி வெற்றி - சூப்பர் ஆன துவக்கம் 

கடைசி ஓவரில் சென்னை அணியின் வெற்றிக்கு 7 ரன் தேவைபட்டது. கைவசம் ஒரு விக்கெட் மட்டுமே இருந்ததால் பரபரப்பு தொற்றிக் கொண்டது. காயத்தால் பாதியில் வெளியேறி மீண்டும் களம் கண்ட கேதர் ஜாதவ், முஸ்தாபிஜூர் ரகுமான் வீசிய கடைசி ஓவரை எதிர்கொண்டார். இதில் முதல் 3 பந்துகளை தவற விட்ட கேதர் ஜாதவ் 4-வது பந்தை சிக்சருக்கு தூக்கினார். அடுத்த பந்தில் பவுண்டரி அடித்து சென்னை அணியின் வெற்றியை உறுதிப்படுத்தினார். 19.5 ஓவர்களில் 9 விக்கெட்டுக்கு 169 ரன்கள் குவித்து ஒரு விக்கெட் வித்தியாசத்தில் திரில் வெற்றியை கண்டது சென்னை சூப்பர் கிங்ஸ் அணி .

இறுதியில் ஆட்டநாயகனாக ப்ராவோ தேர்வுசெய்யப்பட்டார் .